वैदेशिक सहायता परिचालनका बाटा
हालै केन्याको नैरोवीमा सम्पन्न भएको
विकास सहायता परिचालनका लागि अन्तरराष्ट्रिय सहकार्य विषयक दोस्रो
उच्चस्तरीय बैठकका सबै एजेन्डाको सार आत्मनिर्भरतामै केन्द्रित थियो ।
नैरोवीका सबै एजेन्डामाथि भएका बहसको केन्द्रीय तर्क यही थियो ।
कुनै पनि देश आत्मनिर्भरताको बाटोमा अघि
बढ्न चाहे पनि आवश्यकताहरूको असीमितता र विद्यमान साधन–स्रोतको सीमितता तथा
बहुप्रयोगको सम्भावनाले गर्दा अन्तरनिर्भरताको परिबन्दबाट बाहिर निस्कन
सक्दैन भन्ने तथ्यलाई सबै वक्ता तथा प्रस्तुतकर्ताहरूले भुलेको पाइयो ।
आत्मनिर्भरताको जति चर्को राप अलापे पनि
अन्ततः विश्वव्यापी सहयोग, सहकार्य र लाभमा आधारित भाइचारा नै सबैको
सहअस्तित्व र समृद्धिको मेरुदण्ड हो भन्ने साझा निष्कर्ष आयो ।
बैठकको सन्देश स्पष्ट थियो, रााष्ट्रिय
अर्थतन्त्रहरूको पारस्परिक अन्तरनिर्भरताको बाध्यात्मक अवस्थाले नै
विश्वव्यापीकरणको मान्यता बढेको र आर्थिक उदारीकरणको सिद्धान्तको आविर्भाव
भएको हो । वर्तमान विश्वमा वैदेशिक सहायता नै पारस्परिक अन्तरनिर्भरताको
बाध्यात्मकतालाई सहज बनाउने एक उपाय हो ।
विकास सहायताको प्रभावकारी परिचालनमा
नैरोवी बैठकका समसामयिक कार्यसूची केन्द्रित गरिए । यस बैठकका निष्कर्ष तथा
रायहरू पनि नेपालजस्ता पछाडि परेका अल्पविकसित देशको उन्नयनमा नै समर्पित
भए ।
केन्याको नैरोवीमा सम्पन्न अन्तरराष्ट्रिय
बैठकले विकास सहायताको परिचालनको विषयमा महत्वपूर्ण निष्कर्षहरू निकालेको छ
। विकास सहायताको प्रभावकारी परिचालनमा लामो समयदेखिका विश्वव्यापी
प्रयासको पछिल्लो श्रृंखलाका रूपमा यो बैठक भएको हो ।
विभिन्न सूक्ष्म बैठक र कार्यदलस्तरका
छलफलपछि यस बैठकले प्रतिबद्धता–पत्र पनि जारी गरेको छ । विकासका
विश्वव्यापी साझा लक्ष्यहरूको प्राप्तिमा सबै राष्ट्रहरूबीच उद्धेश्यहरूको
एकात्मकता, आपसी अन्तरनिर्भरता र उत्तरदायित्वको भावनालाई नैरोवी बैठकले थप
जोड दिएको छ ।
प्रभावकारी विकास सहायताका लागि समावेशीकरण, आपसी विश्वास र सिर्जनशीलताको खाँचो छ भने विकास साझेदारहरूले राष्ट्रिय नीति तथा रणनीतिहरू र विकासको नतिजा खाकालाई सम्मान गरी सोहीबमोजिम विकास सहायताको परिचालनमा प्रतिबद्ध हुनुपर्ने आवश्यकता हुन्छ ।
दिगो विकासका लागि दाता निकाय तथा प्रापक
राष्ट्रहरूको बीचमा शास्त्रीय सम्बन्धको साटो विकासमा सबैको भूमिका समान
हुनुपर्ने मान्यतालाई नैरोवी बैठकले जोड दिएको छ । सहायताको मात्राभन्दा
यसले ल्याउने परिणाम र पार्ने दीर्घकालीन असरलाई बढी महत्व दिने परिपाटीको
पक्षमा सर्वसहमति देखियो ।
विकासले मूलतः नागरिक, पृथ्वी, प्रगति र
शान्तिजस्ता चार पक्षहरूमा जोड दिनुपर्ने र अबको विकासको ध्येय र गन्तव्य
पनि यी चार पक्ष हुनुपर्ने निष्कर्षमा सबैको मतैक्य रहेको छ । समानतामा
आधारित विकासका लागि वातावरणीय दिगोपना, मानवअधिकार, सम्मानजनक काम, लैंगिक
समानताजस्ता विषयलाई सबै राष्ट्रिय कार्यसूचीको अंग बनाउनुपर्ने,
पारस्परिक उत्तरदायित्वका लागि प्रभावकारी अनुगमनका खाकाको कार्यान्वयन
गर्नुपर्ने र सबै खालको भेदभावको अन्त्य गरी विकासशील देशहरूले विकासको
प्राथमिकतामा आफैं स्वामित्व लिन सक्नुपर्ने, नतिजामुखी विकास, समावेशयुक्त
विकास साझेदारी र उत्तरदायित्व तथा पारदर्शिताजस्ता चारवटा सैद्धान्तिक
मान्यतालाई आत्मसात् गर्नुपर्नेमा यस बैठकको जोड रहेको छ ।
Comments
Post a Comment