Monday, June 27, 2011

वैदशिक व्यापार ९ प्रतिशत बढ्यो

काठमाडौं, ११ असार
चालू आवको वैशाखमा नेपालको वैदेशिक व्यापार ३६५.९८ अर्ब रुपैयाँ पुगेको छ, जुन अघिल्लो आवको तुलनामा ९.१ प्रतिशतले बढी हो । अघिल्लो वर्षको सोही अवधिमा नेपालको वैदेशिक व्यापार ३३५.४५ अर्ब थियो ।
चालू आवको प्रथम १० महिनाको तथ्यांकअनुसार यो अवधिमा नेपालको व्यापार घाटा भने १०.९ प्रतिशतले बढेर २ सय ६१ अर्ब ७७ करोड पुगेको छ । अघिल्लो वर्षको सोही अवधिमा २ सय ३६ अर्ब ४ करोड १५ लाख रुपैयाँ थियो ।
अघिल्लो वर्ष तयारी पोसाक पोलिस्टर तथा अन्य धागो, मुसुरोको दाललगायतका सामानको निर्यात बढे पनि फलाम तथा स्टिलका उत्पादन, पेटोलियम पदार्थ, पोलिथिन, पाम आयल रसायन जस्ता सामानको आयातमा वृद्धि भएकाले व्यापार घाटा बढेको केन्द्रले जनाएको छ ।
केन्द्रका अनुसार यो अवधिमा १४.२ प्रतिशतको व्यापार निर्यात र ८५.८ प्रतिशत आयात भएको छ ।  नेपालको कुल निकासी ४.८ प्रतिशतले बढेर ५२.११ अर्ब रुपैयाँ पुगेको तथ्यांकमा छ ।
यस्तै अघिल्लो वर्षको पहिलो १० महिनाको तुलनामा ४.८ प्रतिशतले निर्यात बढेर  ५२ अर्ब ११ करोड रुपैयाँ पुगेको छ भने आयात पनि ९.८ प्रतिशतले बढेर ३ सय १३ अर्ब ८७ करोड पुगेको छ ।
आव ०६६÷६७ को १० महिनाको अवधिमा निकासी–पैठारी व्यापारको अनुपात १ः५.७ थियो । तथ्यांकअनुसार चालु आवको सोही अवधिमा निकासी–पैठारी व्यापारको अनुपात १ः६.० पुगेको छ ।
यो अवधिमा गलैंचा निकासी १७.५ प्रतिशतले वृद्धि भई ३ अर्ब ९३ करोड रुपैयाँ पुगेको छ । यसैगरी, तयारी पोशाकमा १०.१ प्रतिशतले निर्यात वृद्धि भई ३ अर्ब २६ करोड पुगेको छ भने फलाम तथा स्टिल र तिनको उत्पादनको निर्यात १.२ प्रतिशतले बढेर ८ अर्ब ५४ करोड पुगेको छ ।
पोलिस्टर तथा अन्य धागोमा १९.१ प्रतिशतले बढेर ४ अर्ब ६४ करोड पुगेको तथ्यांकले देखाएको छ । तथ्यांकअनुसार मुसुरोको दाल निर्यातमा ११.४ प्रतिशतले वृद्धि भएको छ भने पस्मिना निर्यात भने घटेर १ अर्बमा झरेको छ ।
केन्द्रका अनुसार चालू आवको सुरुका १० महिनाको आयातमा भने भारी वृद्धि भएको छ । तथ्यांकअनुसार अघिल्लो वर्षको तुलनामा फलाम तथा स्टिल र तिनका उत्पादनको आयात ३६.८ प्रतिशतले बढेर ३६ अर्ब २ करोडबराबर पुगको छ ।
यस्तै पेट्रोलियम पदार्थमा ४३.८ प्रतिशतले बढेर ५७ अर्ब ९ करोड रुपैयाँ, प्लास्टिक दानामा ५९.९ प्रतिशतले बढेर ५ अर्ब १८ करोड, पाम आयलमा १४ प्रतिशतले वृद्धि भई २ अर्ब ६९ करोड र रसायनमा १५.३ प्रतिशतले बढेर ३ अर्ब ६१ करोड रुपैयाँ पुगेको तथ्यांकमा उल्लेख छ ।

No comments:

Post a Comment

मेसेन्जर, भाइबर, ह्वाट्सएपका कारण इन्टरनेटमा पनि दूरसञ्चार कर

सरकारले इन्टरनेट सेवामा पनि पनि यसवर्षबाट दूरसञ्चार सेवा दस्तुर लगाउन सुरु गरेको छ । यसअघि नलिइने यस्तो दस्तुर एकैपटक १३ प्रतिशत पुर्‍याएप...