Sunday, May 29, 2011

‘च्यांग्रा पस्मिना’को प्रचार बीबीसी र सीएनएनमा


निर्यात ३० प्रतिशतले बढ्ने अनुमान
काठमाडौं, १४ जेठ
नेपाल पस्मिना उद्योग संघले नेपाली पस्मिनाको प्रवद्र्धनका लागि अन्तर्राष्ट्रिय स्तरका टेलिभिजन च्यानलमार्फत प्रचार गर्ने भएको छ ।
नेपाली पस्मिना युरोपेली मुलुकमा अत्यधिक मात्रामा निर्यात हुने भएकाले यसको बजार विस्तार गर्न बीबीसी, सीएनएनजस्ता च्यानलबाट ‘च्यांग्रा पस्मिना’ को प्रचार गर्र्न लागएको हो । नेपालबाट उत्पादन हुने पस्मिनाको सम्भाव्यतालाई ध्यान दिँदै संंघले यसअघि युरोपेली संघ (ईयू) अन्तर्गतका सबै मुलुकका साथै नर्वे, स्विट्जरल्यान्ड, अस्टे«लिया, न्युजिल्यान्ड, अमेरिका, क्यानडा, जापान, दक्षिण कोरिया, हङकङ, सिंगापुर र नेपाल गरी ३८ वटा मुलुकमा पस्मिनाको सामूहिक टे«डमार्क दर्ता गरिसकेको छ । अन्य आठ वटा देशमा दर्ता प्रक्रियामा छन् ।
नेपाली पस्मिनाको अन्तर्राष्ट्रिय स्तरमा उल्लेख्य माग भएको र बजारीकरण पक्ष कमजोर भएकाले नेपाली च्यानलका अतिरिक्ति विदेशी च्यानलबाट समेत प्रचार–प्रसार गर्न लागिएकोे संघका कार्यक्रम प्रमुख मधुबाबु अधिकारीले जानकारी दिए । “प्रक्रिया अन्तिम चरणमा पुगेको छ,” उनले भने, “साउनबाट यस्तो कार्यक्रम सुरु हुन्छ ।”
अधिकारीका अनुसार पस्मिनाको प्रचारका लागि पहिलो प्राथामिकतामा सीएनएन र बीबीसी च्यानल परेका छन् । “यो हाम्रो सुरुवात हो, आउने दिनमा यसलाई बढाउँदै लैजान्छौं,” उनले भने, “नेपाली पस्मिनालाई अन्तर्राष्ट्रिय स्तरमा अत्यधिक रुचाइने भएकाले बजारीकरणमा बढी खट्नुपर्ने आवश्यकता छ ।”
संघको यो योजनामा सरकारसमेत सकारत्मक भएको बताउँदै उनले यसका लगि आवश्यक बजेट सरकारबाटै उपलब्ध हुने संकेत दिए । “सरकार रहेकाले आवश्यक रकम पाउने आश्वासन पाएका छौं,” उनले थपे ।
यसअघि सरकारले टे«डमार्क अभावमा विदेशमा उत्पादित पस्मिना नेपालीका नाममा बिक्री गर्ने क्रम बढेको भन्दै सामूहिक टे«डमार्क प्रयोगमा ल्याइसकेको छ । नेपालबाट उत्पादन हुने पस्मिना अमेरिका, अस्ट्रेलिया, जापान, इटाली, बेलायत, फ्रान्स, नर्वे, जर्मनलगायत विश्वका ८० भन्दा बढी मुलुकमा निर्यात हुने गरेको छ ।
हालसम्म नेपालमा करिब २ सयको हाराहारीमा पस्मिना उद्योग सञ्चालनमा रहेको तथा करिब ३० हजार व्यक्तिले रोजगारी पाएको अधिकारीले बताए । नेपाली पस्मिनाको उल्लेख्य सम्भाव्यता भएको भन्दै अधिकारीले व्यापार चिन्ह तथा प्रचार–प्रसारले उद्यमीलाई थप बल पुग्ने उल्लेख गरे ।
गएको असारमा सार्वजनिक गरिएको नेपाल व्यापार एकीकृत रणनीति, २०१० (एनटीआईएस) मा निर्यात व्यापारमा नेपाललाई फाइदा हुने १२ वस्तुमध्ये पस्मिना पनि समावेश थियो । यसलाई पारदर्शी बनाउन उद्योग मन्त्रालयले पस्मिनाको धागो जाँच्ने उपकरणका लागि नेपाल गुणस्तर तथा नापतौल विभागलाई ६४ लाख रुपैयाँ बजेट विनियोजन गरिसकेको छ ।
विदेशी च्यानलमार्फत सरकारी लगानीमा नेपाली उत्पादनको प्रचार–प्रसार गर्न लागिएको यो पहिलो पटक हो । साथै, नेपाली उत्पादनमा विदेशीलाई समावेश गराएर सामूहिक टे«डमार्क दिने पनि पस्मिना संघ पहिलो हो । अधिकारी भन्छन्, “यो हाम्रो सुरुवात हो, यसले हाम्रो निर्यातमा ३० प्रतिशतले वृद्धि हुने अनुमान गरेका छौं ।”

No comments:

Post a Comment