चीनले नेपालमा आठ खर्ब ९६ अर्ब लगानी गर्ने
जलविद्युतदेखि मेट्रो रेलसम्ममा चिनियाँ लगानी
काठमाडौँः स्वदेशी तथा विदेशी लगानीकर्ताहरुले नेपालमा १४ खर्ब ६० अर्ब रुपैयाँ लगानी गर्ने प्रतिबद्धता गरेका छन् ।
सरकारले २५ वर्षपछि गरेको नेपाल लगानी सम्मेलनमा सहभागी स्वदेशी तथा विदेशी लगानीकर्ताहरुले १३ अर्ब ५२ करोड अमेरिकी डलर लगानी गर्ने प्रतिबद्धता जनाएका हुन् ।
यो रकम नेपाल राष्ट्र बैंकले तय गरेको शुक्रबारको डलर भाउ अनुसार १४ खर्ब ६० अर्ब रुपैयाँ हुन्छ ।
सरकारले विदेशी लगानीकर्ताहरुबाट एक खर्ब रुपैयाँ लगानीको प्रतिबद्धता आउने अनुमान गरेकामा चीनका ६ वटा कम्पनीले मात्र ८ खर्ब ९६ अर्ब रुपैयाँ लगानी गर्ने प्रतिबद्धता जनाएका छन् ।
चीनको चाइना मेसिनरी इन्जिनियरिङ कर्पोरेशनले जलविद्युत, अस्पताल र काठमाडौं मेट्रोमा ३ अर्ब डलर तथा चाइना स्टेट कन्स्ट्रक्सन एण्ड इन्जिनियरिङले विमानस्थल, राजमार्ग र टनेलमा २ अर्ब डलर लगानी गर्ने प्रतिबद्धता गरेका छन् ।
भारतीय लगानीकर्ताले भने जम्मा ३१ अर्ब ७० करोड रुपैयाँ लगानीको प्रतिबद्धता जनाएका छन् । भारतको अशोक स्टिल, मेडिकेयर इन्भाइरोमेन्टल र एभरेष्ट चेम्बरले उक्त रकम लगानी गर्ने प्रतिबद्धता गरेका हुन् ।
बेलायत, जापान, बंगलादेश र श्रीलंकाका एक एक वटा, नेपालका तीन वटासहित १६ कम्पनीबाट १४ खर्ब ६० अर्ब रुपैयाँ लगानीको प्रतिबद्धता आएको लगानी बोर्डका प्रमुख कार्यकारी अधिकृत महाप्रसाद अधिकारीले जानकारी दिए ।
नेपालबाट लगानीको प्रतिबद्धता जनाउने कम्पनीमा सामुदायिक कन्साई फर्म, आरएन ग्रुप अफ कम्पनी र हिमाली डिष्टिलरी रहेका छन् । सरकारले सम्मेलनको अन्त्यमा लगानीको प्रतिबद्धता जनाउने तथा सम्मेलनमा सहभागी सबैलाई धन्यवाद दिएको छ ।
Comments
Post a Comment