Wednesday, June 29, 2011

भ्यालेन्टाइन डेका लागि ४० लाखको फूल बिक्री हुने



काठमाडौं, १ फागुन
यो वर्षको प्रणय दिवस (भ्यालेन्टाइन डे) मा ४० लाख रुपैयाँबराबरको गुलाब फूलमात्रै बिक्री हुने व्यवसायीले अनुमान गरेका छन् । यो रकम अघिल्लो वर्षको तुलनामा १५ लाख बढी हो ।
अघिल्लो वर्षभन्दा फूलको मूल्यमा १० प्रतिशतभन्दा बढीले वृद्धि भएको तथा भ्यालेन्टाइनका उपभोक्ता उच्च दरमा बढ्ने भएकाले फूलको कारोबार बढ्ने उनीहरूको ठम्याइ छ ।
नेपाल फ्लोरिकल्चर एसोसिएसनका अनुसार अघिल्लो वर्षको प्रणय दिवसमा २५ लाखबराबरको कारोबार भएको थियो । “प्रत्येक वर्षको प्रणय दिवसमा उल्लेख्य रूपमा व्यापार बढ्ने गरेको छ,” महासंघका महासचिव दिलीप बादे भन्छन् । उनले यस वर्ष सहज वातावरण देखिएकाले २० प्रतिशत उपभोक्ता बढ्न सक्ने जिकिर गरे ।
भ्यालेन्टाइनको समयमा खपत हुने गुलाबमध्ये ४० प्रतिशत भारतबाट आयात गरिएका हुन् । सामान्य अवस्थामा २० प्रतिशत फूल भारतबाट आयात गर्नुपर्छ । तर, भ्यालेन्टाइनमा गुलाबमात्रै धेरै खपत हुने भएकाले सो परिमाणमा आयात गर्नुपरेको एसोसिएसनले जनाएको छ । एसोसिएसनका अनुसार गत वर्ष २५ प्रतिशत मात्र फूल आयात गरिएको थियो ।
यो वर्षको प्रणय दिवसमा ६० देखि ६५ हजार गुलाब बिक्री हुने अनुमान एसोसिएसनको छ । महासचिव बादे भन्छन्, “अघिल्लो वर्ष ५० हजार स्टिक गुलाब बिक्री भएको थियो यो वर्ष ६५ हजार स्टिक बिक्री हुने आपेक्षा छ ।”
थोक व्यापारीका अनुसार एउटा गुलाबको थुंगाको थोक मूल्य २५ देखि ३० रुपैयाँसम्म कायम गरिएको छ भने दुई थुंगा भएको स्टिकलाई ३५ देखि ५० रुपैयाँसम्म पर्छ । “माग बढ्यो भने फूलको मूल्य पनि बढ्न सक्छ नत्र ५० रुपैयाँसम्ममा उपभोक्ताले एउटा गुलाब पाउन सक्ने छन्,” कमलादीस्थित बाग्मती फ्लोरा पसलका सञ्जीव कार्की भन्छन् ।
उनले सामान्य अवस्थामा २० देखि २५ रुपैयाँ पर्ने फूलको मूल्य यो समयमा ३५ रुपैयाँसम्म पर्ने जानकारी दिए । भन्छन्, “खुद्रा व्यापारीले त्यसैलाई ५० रुपैयाँमा बेच्ने गरेको पाइन्छ ।” हरेक सामानमा भएको मूल्यवृद्धिको प्रभाव फूलमा पनि परेको उनको भनाइ छ । “अघिल्लो वर्षभन्दा गुलाबको मूल्य पनि १५ प्रतिशतले वृद्धि हुन्छ,” कार्कीले भने ।
उनले गत वर्षको भ्यालेन्टाइनमा ५० हजारबराबरको गुलाबको कारोबार गरेको बताए । “यस वर्ष ७० हजारसम्मको कारोबार हुने अपेक्षा गरेको छु,” उनले भने ।
प्रणय दिवसको फूल दुई दिनका लागि मात्र भएकाले आन्तरिक उत्पादनभन्दा आयातमा निर्भर रहनुपरेको त्रिपुरेश्वरस्थित युनाइटेड फ्लोरका सञ्चालक लोकमान गैरे बताउँछन् । व्यापारिक शैल एउटै भए पनि समयअनुसार फूलको मूल्यमा वृद्धि हुने उनको भनाइ छ । “प्रेम दिवसकै लागि भनेर २० हजार स्टिक फूल भारतबाट ल्याएको छु,” गैरेले भने ।
उपभोक्ताको माग बढेका कारण यो वर्ष अघिल्लो वर्षभन्दा बजार केही सकारात्मक हुने विश्वास उनको छ । भन्छन्, “अघिल्लो वर्ष व्यापार नहुँदा हामी अन्योलमा परेका थियौं ।” यस वर्ष व्यापार बढ्ने संकेत देखिएको उनको भनाइ छ ।
फूलको कारोबारबाट खुद्रा व्यापारी पनि आशावादी छन् । कमलादीको डेफोडेल फ्लावरमा गुलाब बेच्दै गरेकी सरिता लिम्बू भन्छिन्, “यस वर्षको भ्यालेन्टाइन डेमा केही आशा पलाएको छ तर परिणाम कस्तो हुन्छ त्यो दुई दिनपछि मात्र थाहा हुन्छ ।” उनले गत वर्षको प्रणय दिवसको अघिल्लो दिन ५ हजारको कारोबार गरेको जानकारी दिँदै यो वर्षको सोही दिनमा व्यापारमा दोब्बर वृद्धि भएको बताइन् ।
फूलको मूल्यमा १० प्रतिशत वृद्धि
६५ हजार गुलाब बिक्ने अनुमान
२० प्रतिशतसम्म उपभोक्ता बढ्ने
४० प्रतिशत भारतबाट आयात
गत वर्षभन्दा १५ लाख बढीको कारोबार हुने

No comments:

Post a Comment