Sunday, May 22, 2011

पाँच महिनामा ११ सय उद्योग दर्ता


 काठमाडौं, ७ जेठ
पछिल्लो पाँच महिनाको अवधिमा १ हजार १ सय ६७ वटा साना तथा घरेलु उद्योग दर्ता भएका छन् । घरेलु तथा साना उद्योग कार्यालयका अनुसार पुसदेखि वैशाख मसान्तसम्म १ हजार १ सय १२ साना तथा ५५ वटा घरेलु उद्योग दर्ता भएका छन् ।
पुसमा मात्रै २ सय ४७ उद्योग दर्ता भएका छन् । माघमा २ सय ६०, फागुनमा २ सय ३५, चैतमा १ सय ५२ र वैशाखमा १ सय ७३ उद्योग दर्ता भएका छन् । कार्यालयका अनुसार यो अवधिमा ४५ उद्योगले ठाउँ परिवर्तन गरेका छन् भने ४६ वटाले नामसारी गराएका छन् । १ सय ३८ उद्योगमात्र नवीकरण भएको कार्यालयले जनाएको छ । यो अवधिमा ३८ वटा उद्योग खारेज भएका छन् ।
तथ्यांकअनुसार यी उद्योगको कुल पुँजी ३४ लाख रुपैयाँ छ । यी उद्योगमा ११ हजार २ सय ९५ जनाले रोजगारी पाउने प्रक्षेपण गरिएको छ । यो संख्या राजधानीमा दर्ता हुने उद्योगको मात्रै हो । घरेलु तथा साना उद्योग विभागको तथ्यांकअनुसार गत वर्षको चैत मसान्तसम्ममा मुलुकभर २ लाख २९ हजार ६ सय ८३ उद्योग दर्ता छन् ।
मुलुकका सबैखाले उद्योगहरू दैनिकजसो बन्द हुने क्रम बढ्दै गएकाले लगानीकर्ताहरू साना उद्योगमा आकर्षित भएको कार्यालयका अधिकारीको भनाइ छ । “ठूलो लगानी गर्ने वातावारण अनुकूल नभएकोले लगानीकर्ताहरू साना उद्योगतिर तानिएका छन्,” कार्यालयका उद्योग अधिकृत पुरुषोत्तम शर्माले भने । मुलुकमा लगातार १४ घण्टासम्म लोडसेडिङ, चन्दा आतंकलगायतका कारण ठूला उद्योगमा संकट गहिरिँदै गएको उनले बताए ।
महिना    उद्योग दर्ता
पुस        २ सय ४७
माघ      २ सय ६०,
फागुन   २ सय ३५
चैत       १ सय ५२
वैशाख   १ सय ७३

No comments:

Post a Comment